Gisagara: impanuka ikomeye ihitanye abaganga babiri.

Impanuka ikomeye Imodoka yari itwaye abantu batanu bari mu gikorwa cyo gucyeba [ibizwi nko gusiramura] cyateguwe n’Ikigo cy’Igihugu cy’Ubuzima RBC, yokoreye impanuka mu Murenge wa Kansi mu Karere ka Gisagara, ihitana abaganga babiri.

Iyi mpanuka y’imodoka yo mu bwoko bwa Prado ifite Plaque ya RAB 393 M yabereye mu Kagari ka Sabusaro muri uyu Murenge wa Kansi kuri uyu wa Gatatu tariki 15 Ukuboza 2021, nkuko Radio Tv 10 yabitangaje.

Imodoka yakoze impanuka, yari itwaye abantu batanu bari mu gikorwa cyo gucyeba [Gusiramura] bivugwa ko yataye umuhanda bitewe n’ubunyereri ikagwa mu manga.

Mu bantu batanu bari muri iyi modoka, hahise hitaba Imana babiri ari bo Nyirahabimana Jaqueline wari umuforomo ku kigo Nderabuzima cya Nyarusizi na Kigeme muri Nyamagabe na Mery Uwanyagasani wakoraga ku Kigo Nderabuzima cya Mwendo mu Karere ka Ruhango.

Iyi mpanuka kandi yakomerekeyemo Niyigena Victor wakoraga ku Kigo Nderabuzima cya Karambi, Byiringiro Claude wari utwaye iyi modoka na Bugabo Vivens wakoraga ku Kigo Nderabuzima cya Nyarusiza.

Nubwo hari abatangaza ko iyi mpanuka yatewe n’Ubunyereri bw’umuhanda, Ubuyobozi bw’ibanze buvuga ko uyu muhanda umeze neza.