Social Mula
Ishyirahamwe ry’Umupira w’Amaguru mu Rwanda ‘FERWAFA’ ntabwo ikozwa ibyo guha amafaranga rutahizamu Essomba Leandre Willy Onana ukinira Rayon Sports kugira ngo abone Ubwenegihugu bw’u Rwanda azatangire gukinira Ikipe y’Igihugu Amavubi.
Kuva mu mpera z’ukwezi gushize hatangiye kuvugwa amakuru y’uko Essomba Leandre Willy Onana yamaze kubona indangamuntu y’u Rwanda, bikaba byaravugwaga ko azatangira gukinira Amavubi mu gihe kiri imbere.
Kugeza ubu amakuru ahari ni uko Essomba Leandre Willy Onana atari yabona Ubwenegihugu nk’uko byavuzwe, uyu mukinnyi aracyari mu biganiro na FERWAFA na MINISPORTS kugira ngo azemere gukinira Amavubi.
Amakuru dukesha umunyamakuru Sam Karenzi, ni uko Essomba Leandre Willy Onana yabwiye FERWAFA ko kugira ngo yemere gukinira Amavubi ari uko azabanza guhabwa amafaranga akabakaba miliyoni 80 z’Amanyarwanda.
FERWAFA ikimara kumva ubusabe bwa Essomba Leandre Willy Onana yahise ibyamaganira kure, gusa ubuyobozi bw’Umupira w’Amaguru bwari bwemeye ko bamuha miliyoni zitarenze 25 z’Amanyarwanda.
Impamvu nyamukuru yatumye Essomba Leandre Willy Onana yifuzaga miliyoni 80 z’Amanyarwanda ni uko yavugaga ko ashaka amafaranga yo kugura inzu mu Rwanda kugira ngo agire ubushake bwo kwiyumva nk’Umunyarwanda.
Umwanzuro wafashwe na FERWAFA ni uko bamwemereye kuzamuha amafaranga azongeranya n’andi asanganywe maze akagura iyo nzu mu Rwanda, ariko bamubwiye ko batamuha amafaranga arenga miliyoni 25.
Essomba Onana yageze muri Rayon Sports mu mpeshyi y’umwaka ushize, kuri ubu akaba asigaranye amasezerano y’amezi 9 azarangira mu mpeshyi y’umwaka utaha.
Kuva umwaka w’imikino wa 2022-2023 watangira, Essomba Leandre Willy Onana amaze gutsinda ibitego bitatu mu mikino ine ya shampiyona y’Icyiciro cya Mbere.
