Ferwafa yategetse Kiyovu Sports gukora igikorwa bari barirengagije

Ishyirahamwe ry’umupira w’amaguru mu Rwanda, Ferwafa yasabye Kiyovu gushaka umutoza mukuru kuko uwo bafite w’agateganyo yarengeje igihe kigenwa n’amategeko.

Kuri ubu, Kiyovu Sports itozwa na Mateso Jean de Dieu nk’umutoza w’agateganyo aho itegeko rivuga ko atagomba kurenza iminsi 30 none uyu we amaze amezi abiri ari muri izo nshingano.

Ferwafa yibukije Kiyovu Sports ko nta mutoza mukuru bafite ndetse banaboneraho kubamenyesha ko Mateso atazongera kubatoza ubwo shampiyona izaba isubukuwe.

Komiseri Ushinzwe amarushanwa muri Ferwafa akaba n’Umuvugizi wungirije w’iri shyirahamwe, yemereye ikinyamakuru UMUSEKE ko iyi kipe yarengeje igihe.

Ati “Amabwiriza agenga amarushanwa ya Ferwafa agena ko umutoza w’agateganyo atarenza iminsi 30. Babwiwe ko bagomba gushaka umutoza mukuru.”