Kubwayo Mc croix
Ku itariki ya 14 Ukuboza 2024, FERWAFA (Ishyirahamwe ry’Umupira w’Amaguru mu Rwanda), mu bufatanye na FIFA, batangije umushinga w’ubufatanye wo guteza imbere impano z’umupira w’amaguru w’abakobwa mu gihugu. Uyu mushinga wibanda ku bakobwa bafite imyaka hagati ya 6 na 15, mu byiciro bya U13 na U15.
Iki gikorwa cyitabiriwe n’amakipe ane akomeye: Umuri Foundation WFC, FOREVER WFC, KAMONYI WFC, na Bugesera WFC. Intego nyamukuru ni ukugira abakobwa bakiri bato bashobore kugerageza impano zabo mu mupira w’amaguru no kubafasha kugera ku ntego zabo.
Uyu mushinga ufite akamaro kanini mu iterambere ry’umupira w’amaguru w’abagore mu Rwanda, kuko uzatuma abakobwa batangira guhugurwa hakiri kare, bityo bakaba abakinnyi b’inararibonye kandi bafite impano ku rwego mpuzamahanga. Ni umushinga uteganya kuzamura impano z’abakobwa, gutanga amahirwe yo guhabwa amahugurwa ku rubyiruko no kuzamura impano zabo kugira ngo bategure ejo hazaza heza h’umupira w’amaguru w’abagore mu Rwanda.
Iki gikorwa kizanatanga amahirwe yo guteza imbere abatoza b’abakobwa, bakabasha gukangurira abakiri bato gukunda imikino ndetse no kugera ku ntego zabo.
