HARAGIRIMANA Dieudonne
Umuhanga mu gutunganya umuziki Element uri kwishimira imyaka itatu amaze mu ruganda rw’umuziki nyarwanda, yashimiye imana, anasaba abatanga umusanzu ku muziki nyarwanda gukomeza kuwushyigikira kuko hakiri urugendo rurerure.
Abinyujije ku rukuta rwe rwa Instagram Element yifashishije indirimbo “Henzapu” ya Bruce Melodie, yakoze igatuma izina rye ryamamara, ayikurikiza ubutumwa bushimira buri wese utanga umusanzu we ku muziki nyarwanda.
Ati “Uyu munsi ndikwishimira imyaka 3 ndi mu ruganda rw’umuziki nyarwanda. Birashimishije kandi ni iby’icyubahiro kuba nkora muri iki gisata! Icyubahiro kibe icya Nyagasani.
Impundu ku bantu bose batanga umusanzu muri muzika yacu harimo abahanzi, abaterankunga, abashoramari, abamamaza kandi cyane cyane abafana. Nyamuneka, Ntimuzagahagarike ibikorwa byanyu.
Haracyari urugendo rurerure rwo kugenda! Imana ibahe umugisha mwese.”
