Kubwayo Mc croix
Nyuma y’imyaka umunani itaba, irushanwa rya Copa do Brasil mu mupira w’abagore rigiye kongera gusubukurwa mu mwaka wa 2025, nk’uko byemejwe n’Ishyirahamwe ry’umupira w’amaguru muri Brezile (CBF). Ni icyemezo cyashimishije benshi bakurikirana iterambere ry’umupira w’abagore, ndetse kikaba gifatwa nk’intambwe ikomeye mu kongera imbaraga muri iyi siporo yahoraga isumbirijwe n’ubushobozi buke n’ubwitabire buke bw’abafana.
Iri rushanwa rizahuza amakipe 64 yo mu byiciro bitandukanye by’umupira w’abagore muri Brezile, arimo ayo mu cyiciro cya mbere (Série A1), icya kabiri (Série A2), n’icya gatatu (Série A3). Ni uburyo bwitezweho guha amahirwe menshi amakipe yiganjemo ayo mu byiciro byo hasi kugira ngo yongere imikino ku ngengabihe yayo, bitume n’abakinnyi babasha kwiyereka abashoramari n’abatoza b’amakipe akomeye.
Nubwo iri rushanwa rizafasha cyane mu kongera imikino, ibibazo by’ingutu biracyahangayikishije amakipe menshi, cyane cyane ayari mu byiciro byo hasi. Ayo makipe akenshi agizwe n’abakinnyi bataraba ab’umwuga, aho hafi 70% by’abagore bakina umupira muri Brezile baba bafite akandi kazi bashingiraho imibereho. Ibi bigaragaza ko kugira ngo Copa do Brasil ibe ingirakamaro birenze gutegura imikino gusa hakenewe gushyigikirwa mu buryo bw’amafaranga, ibikoresho, amahugurwa n’ubuvugizi.
Ishyirwaho ry’iri rushanwa rigomba kuvanwaho urwicyekwe ko ari igikorwa cy’igihe gito. Ahubwo ni ngombwa ko CBF n’izindi nzego bireba bubaka gahunda irambye, ishingiye ku bikorwa bifatika: guha ingengo y’imari amakipe y’abagore, guteza imbere amarushanwa y’abakiri bato, kongera umubare w’abatoza b’abagore bafite ubumenyi buhanitse, ndetse no gukangurira itangazamakuru gukurikirana aya marushanwa mu buryo buhoraho.
Isubiramo rya Copa do Brasil ni ubutumwa bukomeye ku bakunzi ba ruhago bose: siporo y’abagore ifite agaciro kandi ikeneye gushyirwamo imbaraga nk’iy’abagabo. Gusa kugira ngo iyi gahunda itange umusaruro, ni ngombwa ko iganisha ku guhindura imyumvire, aho abantu batagifata umupira w’abagore nk’ikintu cy’inyongera, ahubwo nk’igice cyuzuzanya na ruhago yose muri rusange.
Copa do Brasil y’abagore ni amahirwe mashya yo gutuma ruhago y’abagore muri Brezile itera imbere mu buryo bufatika. Ariko ayo mahirwe azagerwaho ari uko hafashwe ingamba zifatika mu bijyanye n’inkunga, ubufasha buhoraho, kongera imikino, no guha agaciro abagore nk’abakinnyi, abatoza n’abayobozi b’umupira. Nibwo bizashoboka ko irushanwa rizavamo igisubizo kirambye ku iterambere rya siporo y’abagore, ritari urwitwazo rwo guhisha ibibazo bimaze igihe.
