Kubwayo Mc croix
Carlo Ancelotti akomeje kwandika amateka muri Real Madrid. Nyuma yo kwegukana Super coup y’u Burayi, uyu mutoza w’Umutaliyani amaze gutwara ibikombe 14 muri iyi kipe, akaba anganya ibikombe na Miguel Muñoz nk’umutoza utwaye ibikombe byinshi mu mateka y’iyi kipe.
Muri ibi bikombe 14, Ancelotti yegukanye Champions League 3, Club World Cup 2, Super coup y’u Burayi 3, La Liga 2, Copa del Rey 2, na Supercopa ya Espagne 2. Uyu mutoza, wakiriwe n’umuyobozi wa Real Madrid wamuhaye umwambaro w’icyubahiro kubera iyi ntsinzi, yageze ku mibare ya Miguel Muñoz, umwe mu batoza bakomeye b’iyi kipe.
Miguel Muñoz ni izina rikomeye muri Real Madrid, aho yatoje iyi kipe imyaka 14 ikurikirana. Muri icyo gihe, yayitoje imikino 605, atwara ibikombe birimo Champions League 2, Intercontinental Cup 1, La Liga 9, na Copa del Rey 2. Mbere yo kuba umutoza, Muñoz yari umukinnyi w’iyi kipe mu myaka ya 1948 kugeza 1958, aho yegukanye ibikombe birimo Champions League 3, La Liga 4, na Latin Cup 2.
Ubuhanga bwa Carlo Ancelotti ndetse n’ubunararibonye bwe bwamuhaye umwanya ukomeye mu mateka ya Real Madrid. Kuba yarabashije gutwara ibi bikombe byose byerekana ubushobozi bwe budasanzwe n’uburyo abasha kuyobora ikipe ye kugera ku ntsinzi. Abafana ba Real Madrid ndetse n’abakunzi ba ruhago bose barahamya ko Ancelotti ari umwe mu batoza bakomeye kandi bazakomeza kwandika amateka mu ikipe yabo.
