CAF yashyizeho uburyo bushya bwo Kwerekana imikino mu karere ka Afurika yo munsi y’Ubutayu bwa Sahara.

Impuzamashyirahamwe y’Umupira w’Amaguru muri Afurika (CAF) yatangaje ko yashyizeho uburyo bushya bwo gutanga uburenganzira bwo kwerekana imikino (Media Rights) mu ndimi z’Igifaransa mu bihugu 13 byo muri Afurika yo munsi y’ubutayu bwa Sahara ku gihe cy’umwaka wa 2024/25.

Ibihugu bifite amahirwe yo kubona ubu burenganzira ni:

– Uburundi
– Komore
– Repubulika Iharanira Demokarasi ya Kongo
– Etiyopiya
– Kenya
– Madagasikari
– Malawi
– Ibirwa bya Maurice
– u Rwanda
– Seychelles
– Uganda
– Zambiya
– Zimbabwe

Ubu burenganzira butangwa ku buryo budaheza (non-exclusive), bivuze ko ibigo bitandukanye bishobora kubuhabwa ku buryo budashingiye kuri kompanyi imwe gusa. Ibi bizafasha mu guteza imbere umupira w’amaguru muri ibyo bihugu, binyuze mu kwerekana imikino ya CAF ku maradiyo na televiziyo atandukanye.

CAF yemeje ko iki cyemezo kigamije guha amahirwe menshi abafana ba ruhago bo muri ibyo bihugu, bakabasha gukurikirana imikino itandukanye irimo nk’amarushanwa y’Afurika y’ibihugu (AFCON), amarushanwa y’amakipe (CAF Champions League na CAF Confederation Cup), n’andi marushanwa ya CAF.

Iki ni igikorwa cy’ingenzi mu iterambere ry’umupira w’amaguru muri Afurika, kikaba kizatuma abafana babasha gukurikirana imikino ku buryo bworoshye kandi bwagutse.