Byari amarira n’agahinda ubwo wa mwana waciwe umutwe yashyingurwaga

Urupfu rwa Imanishimwe Josiane rwamenyekanye tariki ya 16 Ugushyingo 2022 mu masaha ya Saa moya z’umugoroba, kandi yishwe aciwe umutwe n’umugizi wa nabi utaramenyekana ahagana Saa kumi n’ebyiri n’igice kuri uwo mugoroba.

Umuhango wo gushyingura Imanishimwe Josiane, umwana w’imyaka 11 wishwe aciwe umutwe, wabereye mu irimbi rusange riri mu murenge wa Gishari nyuma y’amasengesho yo kumusabira yabereye mu rusengero rwa Zion Temple Mwulire, kuwa Gatandatu tariki ya 19 Ugushyingo 2022.

Umuhango wo gushyingura Imanishimwe Josiane waranzwe n’umubabaro mwinshi, abenshi bagaragazaga agahinda batewe n’ubwicanyi ndengakamere bwakorewe uwo mwana.

Abaturage benshi bitabiriye uwo umuhango wo gushyingura Imanishimwe Josiane bafatwaga n’ikiniga bagasuka amarira menshi, ariko na bamwe muribo bakavuga amagambo yashimangiraga ko umubyeyi w’umwana wapfuye n’abaturage bose bakeneye kubona Ubutabera.Magingo aya ntiharamenyekana umugizi wa nabi wishe uyu mwana.