Kubwayo Mc croix
Mu gihe ikipe ya Manchester United ikomeje kwiyubaka kugira ngo yongere kwitwara neza mu marushanwa atandukanye, umukinnyi mushya Diego León, ukomoka muri Paraguay, yageze mu mujyi wa Manchester aho yatangiye urugendo rwo kwinjira mu ikipe y’ibikomerezwa byo mu Bwongereza.
Nk’uko byatangajwe n’ibinyamakuru mpuzamahanga, Diego León, w’imyaka 17, yaturutse muri Cerro Porteño, imwe mu makipe akomeye muri Paraguay. Uyu mukinnyi, ukina inyuma ku ruhande rw’ibumoso, yagaragaje ubuhanga budasanzwe mu mikino yo muri Amerika y’Epfo, bikaba aribyo byatumye Manchester United imutangaza nk’umwe mu bakinnyi bayo bashya.
Mu rugendo rwe rw’i Manchester, León yafotowe ari kumwe n’umukinnyi wo hagati w’ikipe ya Manchester City, Kevin De Bruyne, ndetse n’abakinnyi ba Manchester United barimo Alejandro Garnacho na Lisandro Martínez. Iyi foto yagaragaje urugwiro ruri hagati y’aba bakinnyi, bishimangira uburyo León yatangiye kumenyera ubuzima bwa ruhago yo mu Bwongereza.
Nk’uko amakuru abivuga, Diego León azakomeza gukinira Cerro Porteño kugeza muri Nyakanga 2025, ubwo azaba agarutse i Manchester ku rwego rw’ibanze, mbere y’uko atangira gukinira ikipe nkuru ya United. Amasezerano ye yitezweho kumufasha gutera imbere mu kibuga no guhesha ikipe ya Manchester United imbaraga zidasanzwe mu ruhando mpuzamahanga.
Diego León afatwa nk’umwe mu bakinnyi bafite impano idasanzwe, akaba azwiho imbaraga, umuvuduko, n’ubuhanga bwo gucenga abakinnyi bahanganye. Kuba yarafotowe ari kumwe na Kevin De Bruyne, umwe mu bakinnyi beza ku isi, bishobora kumufasha kumva neza uburemere n’icyubahiro byo gukina muri shampiyona y’u Bwongereza (Premier League)
