Breaking News: Kapiteni wa Rayon Sports yamaze kuyitera umugongo yigira hanze y’u Rwanda

Kapiteni wa Rayon Sports, Muhire Kevin yamaze kwerekeza muri Misiri aho asanzeyo ikipe ya Al Yarmouk FC yo mu gihugu cya Kuwait aherutse gusinyira.

Muhire Kevin yahagurutse mu Rwanda kuri uyu wa Gatatu tariki ya 3 Kanama 2022, aho yafashe indege imwerekeza muri Misiri aho ikipe ye iri gukorera preseason.

Muhire Kevin yatangiye ibiganiro n’ikipe ya Al Yarmouk FC nyuma y’uko iyi kipe ibonye umutoza mushya Jorge Manuel da Silva Paixao dos Santos wahoze atoza Rayon Sports mu mwaka ushize w’imikino.

Bivugwa ko Jorge Paixão yasabye ubuyobozi bw’ikipe ya Al Yarmouk FC gusinyisha Muhire Kevin, akaba ari nayo mpamvu ubuyobozi bw’iyi kipe bwakoze ibishoboka byose kugira ngo bumwegukane.

Muhire Kevin yahagurutse ku munsi w’ejo saa Kumi z’amanywa ku  kibuga Mpuzamahanga cy’indege cya Kigali i Kanombe yerekeze mu gihugu cya Misiri.

Muhire Kevin arahita asinya amasezerano y’imyaka ibiri mu ikipe ya Al Yarmouk FC ikazajya imuhemba arenga miliyoni 5 z’Amanyarwanda buri kwezi.

Ikipe ya Al Yarmouk FC yamanutse mu Cyiciro cya Kabiri nyuma yo gusoza ku mwanya wa 9 mu makipe 10 mu mwaka ushize.