Kubwayo Mc croix
Ikipe y’Igihugu y’Abagore y’umupira w’amaguru, izwi nka “She-Amavubi”, iri mu myiteguro ikomeye y’imikino ibiri yo gushaka itike y’Igikombe cya Afurika cya 2025, aho izahura na Misiri. Umukino ubanza uteganyijwe kubera i Kigali ku wa 21 Gashyantare 2025, mu gihe uwo kwishyura uzabera i Cairo ku wa 25 Gashyantare 2025.
Ku wa 10 Gashyantare 2025, Ishyirahamwe ry’Umupira w’Amaguru mu Rwanda (FERWAFA) ryatangaje ko Cassa Mbungo André yagizwe Umutoza Mukuru w’Amavubi y’Abagore. Yungirijwe na Mukamusonera Théogenie na Munyana Séraphine. Safari Mustapha Jean Marie ni Umutoza w’Abanyezamu, naho Yadufashije Jeannine ashinzwe kongerera abakinnyi imbaraga.
Mu bakinnyi bahamagawe harimo Ndakimana Angeline, Mutuyimana Elisabeth, Uwamahoro Diane (Abanyezamu), Abimana Djamila, Mukantaganira Joselyne, Uzayizenga Lydia, Uwanyirigira Safi, Maniraguha Louise, Uwase Andorsene, Mukahirwa Providence, Nibagwire Sifa Gloria (Ba myugariro), Mukeshimana Dorothe, Nzayituriki Luminate, Umwariwase Dudja, Tugeriwacu Leonce, Usanase Zawadi, Umuhoza Yvonne, Karimba Alice, Kayitesi Alodia, Umuhoza Angelique (Abakina hagati), ndetse na Dukuzumuremyi Yvonne, Imanizabayo Florence, Irumva Delphine, Nibagwire Liberathe, Niyonshuti Emerance (Ba rutahizamu).
Imyitozo yatangiye ku wa 10 Gashyantare 2025 kuri Kigali Pelé Stadium, aho abakinnyi bose bahamagawe bitabiriye. Umwiherero w’ikipe watangiye ku wa 9 Gashyantare 2025, ugamije gutegura neza aba bakinnyi mbere y’iyi mikino ikomeye.
Cassa Mbungo André, Umutoza Mukuru mushya, yatangaje ko yizeye ko ikipe izitwara neza muri iyi mikino. Yagize ati: “Dufite abakinnyi bafite impano n’ubushake. Turizera ko tuzabona itike y’Igikombe cya Afurika.”
Cassa Mbungo André ni umwe mu batoza bafite ubunararibonye mu mupira w’amaguru mu Rwanda. Yatoje amakipe atandukanye arimo SEC Academie, Kiyovu Sports, Police FC, AS Kigali, ndetse no mu makipe yo muri Kenya nka AFC Leopard na Bandari FC. Mu 2014, yabaye Umutoza w’agateganyo w’Ikipe y’Igihugu ‘Amavubi’.
She-Amavubi iri mu myiteguro ikomeye yo guhatana na Misiri mu mikino yo gushaka itike y’Igikombe cya Afurika cya 2025. Abanyarwanda bose barasabwa gushyigikira iyi kipe kugira ngo izabashe kugera kuntego zayo.
