Kubwayo Mc croix
Nyuma y’imyaka ibiri adataramira mu Rwanda, The Ben yongeye kuzamura urukundo n’ibyishimo mu gitaramo gikomeye cyabereye muri BK Arena. Iki gitaramo cyongeye gushimangira urukundo rwihariye afitanye n’abafana be, ndetse kigaragaza ubudasa bw’umuziki nyarwanda ku rwego mpuzamahanga.
The Ben yaherukaga gutaramira muri BK Arena ku wa 7 Kanama 2022 mu gitaramo cya Rwanda’s Rebirth Celebrations, aho yari yagarutse mu Rwanda nyuma y’igihe atuye muri Leta Zunze Ubumwe za Amerika. Mbere yaho, ku wa 1 Mutarama 2020, yari yataramiye muri BK Arena mu gitaramo cya East African Party, kimwe mu byari bimaze kuba ikimenyabose mu gufasha Abanyarwanda gutangira umwaka mushya mu byishimo bisendereye.
Uyu mwaka, The Ben yagarutse muri BK Arena mu gitaramo cyasize amateka mashya. Abafana bari baje mu mubare munini, bagaragaza urukundo rudasanzwe bafitiye uyu muhanzi wagize uruhare rukomeye mu guteza imbere umuziki nyarwanda. Amafoto yafashwe muri iki gitaramo agaragaza ibyishimo byuzuye ndetse n’ibihe bidasanzwe byabereye muri BK Arena.
Iki gitaramo ni ikimenyetso cy’uko BK Arena ikomeje kuba urubuga rw’amateka ku bahanzi nyarwanda no mu karere, aho ibikorwa by’ubuhanzi bikomeje gusiga umurage w’ibihe bitazibagirana. The Ben, nk’umuhanzi ukomeje kwandika amateka mu muziki nyarwanda, yongeye gushimangira ko ari umwe mu bakunzwe cyane, kandi igitaramo cye kizahora kivugwa mu mateka y’imyidagaduro mu Rwanda.
