Kubwayo Mc croix
Ku wa 1 Mutarama 2025, mu gitaramo cy’amateka cyitabiriwe n’imbaga y’abakunzi ba muzika Nyarwanda, umuhanzi The Ben yongeye kugaragaza urukundo n’ishimwe mu magambo yuje amarangamutima. Ku rubyiniro, yasutse amarira asaba Abanyarwanda gushyigikira abahanzi babo bose kugira ngo iterambere ry’umuziki Nyarwanda rikomeze gutera imbere.
Mu ijambo rye, The Ben yagize ati: “Ibi bintu rero mwankoreye, n’abandi bahanzi mufite muzabibakorere.” Aya magambo yagaragaje ko ashima cyane uburyo abakunzi be bamushyigikiye muri iki gitaramo, ndetse yasabye ko urwo rukundo rutagarukira ku bahanzi bake gusa, ahubwo rukagera no ku bandi bafite impano zitandukanye.
Nubwo hatigeze hatangazwa niba amatike yose yagurishijwe, ubwitabire bw’iki gitaramo bwari ntagereranywa, bigaragaza ko The Ben akomeje kuba ku isonga mu bahanzi bafite abakunzi benshi mu Rwanda no hanze yarwo.
Uyu muhanzi, uzwiho ubuhanga mu gutaramira imbaga, yongeye gushimangira ko iterambere ry’umuziki Nyarwanda rishingiye ku bufatanye hagati y’abahanzi n’abakunzi babo.
Iki gitaramo cyabaye tariki ya 1 Mutarama 2025 cyasize inkuru nziza y’ubufatanye no gushyigikirana, kikaba kitezweho guha abandi bahanzi isomo n’ubutumwa bw’ubufatanye mu rugendo rwabo rwa muzika.
Amashusho The Ben yongeye gusuka amarira ku rubyiniro
