Amarangamutima ya bamwe mu bakinnyi babanye na Yvan Buravan ubwo bari bakiri abanyeshuri

Bamwe mu bakinnyi bari inshuti za Yvan Buravan witabye Imana bababajwe cyane n’urupfu rw’uyu musore witabye Imana akiri muto.

Yvan Buravan wabaye inshuti n’abakinnyi ubwo yigaga kuri La Colombiel, dore ko yahoranaga na bamwe mu bakinnyi bo mu kademi ka APR FC.

Nyuma y’uko amakuru y’urupfu rw’uyu musore agiye hanze bamwe mu bakinnyi bari inshuti ze bashavujwe n’uyu musore witabye Imana.

IRADUKUNDA Bertrand ukina muri KIYOVU SPORTS yagize Ati: “Buravan yari inshuti nziza yakundaga gukina umupira w’amaguru kandi anabizi cyane, twamenyanye ataraba umuhanzi ukomeye ariko wabonaga afite inzozi zo kuzaba umuhanzi ukomeye, akabirwanira ishyaka kandi yaje kubigeraho. Azahora mu mitima yacu kandi yatwigishije ko gushaka ari ugushobora.”

Mu gihe Yannick MUKUNZI aganira na ISIMBI yagize Ati “Yvan Buravan ibyo ntazamwibagirwaho ni byinshi cyane sinabirondora kano kanya bitewe n’uko ndimo kwiyumva aka kanya. Gusa yari umusore ukundana cyane kandi nta kibazo yakundaga kugirana n’umuntu.”

RUTANGA Eric we yabinyujije ku mbuga nkoranyambaga ze aho yagize Ati: “Ruhukira mu mahoro muvandimwe Yvan Buravan gusa ndagukunda na we wari ubizi, gusa Nyagasani akwakire mu ba yo.”

Yvan Buravan yitabye Imana mu rukerera rwo kuri uyu wa Gatatu tariki ya 17 Kanama 2022 akaba yarazize kanseri y’urwagashya.