Amakuru areba buri munyarwanda wese: Dore Igiciro k'ibiribwa kigezweho ku masoko y'urwanda

Amakuru areba buri munyarwanda wese: Dore Igiciro k’ibiribwa kigezweho ku masoko y’urwanda

Ugeze ku isoko uheruka yo nko mu mezi atatu ashize ushobora gukubitwa n’inkuba kubera ukuntu igiciro gikomeza gutumbagira umunsi ku wundi.

Ni mu gihe leta yari yaragerageje gushyira ho igiciro cya bimwe mu buribwa nkumuceri kawunga n’ibindi gusa ibyo byabaye ibyubusa kuko nta hantu na hamwe byigeze bikurikizwa.

Ibiciro biri ku masoko…

Ibirayi ni bimwe mu biribwa biri gukomeza kuzamuka kuko hari n’ibigeze ku 1500 Frw. Ibyo ni ibizwi nka Gikungu. Ibirayi bya Kinigi biri kugura hagati ya 700 Frw na 800 Frw bitewe n’uko umucuruzi yaranguye.

MINICOM iherutse gutangaza ko ibirayi bidakwiriye kurenza 500 Frw mu gihe byaba byakabije gusa nti byigeze bikurikizwa.

Ibindi binyamafu na byo byarazamutse kuko nk’amateke ikilo kiri kugura 1000 Frw kivuye kuri 800 Frw, ibijumba bigura 700 Frw bivuye kuri 500 Frw byariho mu mezi nk’atatu ashize. Imyumbati iri kugura 1000 Fw ku kilo ivuye hagati ya 750 Frw na 800 Frw, igiciro inganya n’ibikoro.

Ibishyimbo byo nubwo igiciro cyabyo kikiri hejuru ariko ubwoko bwinshi bwaragabanyutse.

Nk’ibizwi nk’ingemane biri kugura 1500 Frw bivuye ku 1800 Frw byagurishwaga mu mezi nk’atatu ashize, mu gihe ibya Mutiki biri kugura 1400 Frw bivuye ku 1700 Frw muri ayo mezi.

Ibizwi nka Shyushya biri kugurishwa 1300 Frw bivuye ku 1600 Frw byagurishwaga nko muri Kamena.

Umufuka w’ibilo 25 w’umuceri w’umu-Tanzania nimero ya mbere uri kugura ibihumbi 38 Frw mu gihe uwa nimero ya kabiri uri kugura ibihumbi 35 Frw, wakora imibare ugasanga ikilo kimwe kigura 1520 Frw na 1400 Frw.

Ikilo cy’umuceri wa Pakistan kiri kugura 1400 Frw kivuye ku 1200 Frw mu mezi atatu ashize, Umuhinde ukagura 1200 Frw (igiciro wahozeho) mu gihe umuceri wa Thailand wo uri kugura 1500 Frw uvuye ku 1300 Frw waguraga nko muri Kamena.

Kawunga nimero ya mbere MINICOM itangaza ko itagomba kurenza 800 Frw, kuri ubu iri kugura 1200 Frw ivuye ku 1000 Frw mu gihe garama 500 z’amakaroni manini ziri kugura 1000 Frw, garama 450 Frw zikagura 900 Frw naho garama 250 z’amakaloni mato zikagura 500 Fw.

Kuri ubu amavuta y’igihwagari ya litiro eshanu ari kugura ibihumbi 16 Frw avuye ku bihumbi 18 Frw yaguraga mu mezi atatu ashize, mu gihe azwi nka zahabu angana atyo ari kugura ibihumbi 10 Frw avuye kuri 13 Frw.

Inyama z’inka ikilo cy’imvange kiri kugura 4000 Frw, iloti ikagura 5000 Frw ibiciro bitahindutse mu mezi atatu ashize.

Ni mu gihe inyama y’inkoko y’inzungu iri kugura 3800 Frw ku kilo ivuye ku 5000 Frw mu mezi atatu ashize naho inyarwanda yo ikagura 6000 Frw ivuye ku 5000 Frw. Ikilo cy’ifi kiri kigura 4500 mu gihe ibaze iri kugura 8000 Fw.

Iyo uganiriye n’abacuruzi akenshi bitsa ku musaruro muke w’ubuhinzi nk’intandaro y’itumbagira ry’ibi biciro, bigatizwa umurindi n’amafaranga bishyura ibibanza bacururizamo n’imisoro.