HARAGIRIMANA Dieudonne
Umusore w’imyaka 20 witwa James Taylor wo muri Leta Zunze Ubumwe za America muri Leta ya Chicago , ashobora gufungwa imyaka 21 muri gereza azira amaguru y’inkoko akaranze yamufatishije ubwo yari amaze kwiba nyirayo ,aho kugirango ave aho yakoreye icyaha akahaguma yirira ayo maguru y’inkoko kugeza ubwo bamufashe.
Inkuru dukesha ikinyamakuru Cwb Chicago ivuga ko James Taylor yagiye kwiba akoresheje intwaro umugabo w’imyaka 35 utuye Chicago ,mu gace ka South Calumet kuwa gatandatu tariki 18 Gashyantare 2023 ku isaha ya saa saba z’ijoro .
Ngo Taylor yabanje kwaka uyu mugabo ikibiriti ,undi amubwira ko ntacyo afite arangije amufata ku rutugu ,undi ahindukiye asanga bamutunze imbunda ntoya , Taylor yahise amusaba kumuha ibyo afite ,umugabo amuha amadolari 2 yari afite , amuha ikarita ya Bank ,amuha n’inkoko zikaranze yari atahanye .
Taylor ngo yahise areka uwo mugabo yinjira mu nzu nawe ajya kwicara mu modoka y’uwo mugabo yari amaze kwiba atangira kwirira amaguru y’inkoko zikaranze ,cyakora ntiyigeze atekereza ko uwo yari yibye yari yahamagaye polisi ,kuko yahise ihamusanga atararangiza kurya izo nkoko.
Kugeza kuri ubu akaba akurikiranyweho ubujura bukoresheje intwaro bushobora kumufungisha imyaka 21 muri gereza .
