Kubwayo Mc croix
Polisi y’u Rwanda yatangaje ko mu minsi ishize Miss Muheto Divine yafashwe atwaye ikinyabiziga yanyoye ibisindisha birengeje igipimo cyemewe n’amategeko, kandi nta ruhushya rwo gutwara ibinyabiziga agira. Mu bihe byabayeho, yatwaye imodoka agonga ibikorwa remezo, ndetse ahita ahunga nyuma yo gukora impanuka.
Uyu mukobwa wambitswe ikamba rya Nyampinga w’u Rwanda mu 2022, ashinjwa kurenga ku mategeko y’umutekano wo mu muhanda. Polisi yatangaje ko atari ubwa mbere Miss Muheto Divine yakoze amakosa yo gutwara ikinyabiziga anyuranyije n’amategeko, ndetse no kunywa ibisindisha agasubira mu muhanda atabyemerewe.
Nyuma y’ibyo byaha, dosiye ye yahise ikorwa n’inzego zishinzwe iperereza maze ishyikirizwa ubushinjacyaha, kugira ngo hakurikizwe amategeko agenga ibibazo nk’ibi.
Polisi yongeye kwibutsa ko abatwara ibinyabiziga bagomba kubahiriza amategeko y’umutekano wo mu muhanda, birinda gutwara banyoye ibisindisha cyangwa badafite uruhushya rubemerera gutwara.
Iki kibazo kigaragaza impungenge ku buryo bamwe mu baturage barenga ku mategeko y’umuhanda, bikaba bishobora gushyira ubuzima bwabo n’ubw’abandi mu kaga. Polisi isaba buri wese kubahiriza amategeko, cyane cyane abatwara ibinyabiziga, kugira ngo hirindwe impanuka n’ingaruka zikomeye zituruka ku burangare cyangwa ku makosa yo mu muhanda.
