Epaphrodite Nsengimana
Abatoza bungirije ba APR FC bakozanyijeho n’abungiriza ba Rayon Sports maze Haringingo Francis arabunga, nyuma yo guterana amagambo ku mpande zombi maze batangira gufatana mu mashati bituma babaha amakarita y’umuhondo.
Hari mu mukino w’Umunsi wa 19 wa Shampiyona, Rayon Sports yatsinzemo mukeba w’ibihe byose, APR FC, igitego 1-0 kuri Stade ya Huye ku Cyumweru, tariki 12 Gashyantare 2023.
Uku gushyamirana byarangiye ku munota wa 82 w’umukino, myugariro wa Rayon Sports, Mitima Isaac, yaryamye hasi mu rubuga rw’amahina rw’ikipe ye nyuma yo kugira ikibazo cy’imvune maze ajya kwitabwaho n’abaganga.
Umusifuzi yasabye abaganga kujya kuvurira Mitima hanze, maze batindaho gato kumwemerera kugaruka mu kibuga.
Ubwo umutoza wungirije wa Rayon Sports, Rwaka Claude yasakuje cyane yinubira abasifuzi batari bari kwemerera myugariro we Mitima Isaac ko yasubira mu kibuga. Aha ni ho Umutoza wungirije wa APR FC, Jamel Eddine Neffati, yamubwiye nabi ati “Uri kuvuga cyane, gabanya amagambo ureke abasifuzi bakore akazi kabo.”
Nyuma y’aya magambo Rwaka yarakaye cyane abwira umusifuzi wa kane Nizeyimana Isiaq ko bari gutindira ikipe ye kwinjiza umukinnyi, amubaza niba bari bukomeze gukina batuye. Maze ubushyamirane buhera aho.
