Social Mula
Mbere y’amasaha macye ngo ikipe ya Rutsiro FC icakirane na Rayon Sports, imihigo ku makipe yombi irakomeje aho buri ruhande rwifuza kuzegekana amanota atatu.
Ku gicamunsi cyo ku wa Gatandatu tariki 25 Gashyantare 2023, kuri Stade Mpuzamahanga y’i Rubavu (Umuganda) ikipe ya Rutsiro FC izahakirira Rayon Sports mu mukino w’umunsi wa 21 wa shampiyona y’Icyiciro cya Mbere umwaka w’imikino wa 2022-2023.
Amakuru dukesha Radio 10 ni uko ubuyobozi bw’ikipe ya Rutsiro FC bwambuye Telefone abakinnyi kugira ngo birinde ibibarangaza barusheho gushyira umutima n’imbaraga ku mukino bazacakiranamo na Rayon Sports.
Kugeza ubu ikipe ya Rutsiro FC yashyizeho agahimbazamusyi kangana n’ibihumbi 200 by’Amanyarwanda, mu gihe Rayon Sports yo gutsinda uyu mukino abakinnyi bazahabwa ibihumbi 100, bisobanuye ko ikipe Rutsiro FC izaba ikubye inshuro ebyiri ikipe ya Rayon Sports.
Aya makipe yombi ubwo yahuraga ku munsi wa mbere wa shampiyona ikipe ya Rayon Sports yatsinze Rutsiro FC ibitego bibiri kuri kimwe mu mukino wabaye tariki 20 Kanama 2022.
Ikipe ya Rayon Sports iri guhanganira igikombe cya shampiyona kuri ubu ikaba ifite amanota 39 aho iri ku mwanya wa kabiri, mu gihe Rutsiro FC iri guhatanira kutazamanuka mu Cyiciro cya Kabiri kuri ubu iri ku mwanya wa 14 n’amanota 18.
