Abagabo bo muri Ghana baratabaza ko nyuma yo gukira COVID19 byabananiye kongera gutera akabariro

Abagabo bo muri Ghana baravuga ko nyuma yo gukira icyorezo cya Covid-19 batarimo gushobora gutera akabariro nk’ibisanzwe.

Ishyirahamwe ry’ubuvuzi rya Ghana (GMA) ariryo shyirahamwe ry’abaganga b’ubuvuzi ryemeje ko ryakiriye ibirego byinshi ku mikorere mibi y’umugabo urokotse Covid-19. Nk’uko byatangajwe na Visi Perezida w’iryo shyirahamwe, Dr. Frank Serebour, ashimangira ko abantu benshi bakize indwara ya Covid-19 barimo kugira ubundi buryo budasanzwe bwo kutagira ubushake mu gihe cy’imibonano mpuzabitsina mu gihe abandi nta zindi ngorane bafite.

Yatangaje ati: “Ingaruka za Covid-19 ziragenda zigaragara ndetse n’ubushakashatsi bumwe bwerekana ko abagabo bamwe bakize burundu ubwandu bwa virusi baba batakibasha kugira ubushake mu mibonano mpuzabitsina.”

Ku rundi ruhande, umuyobozi w’akarere ka Ashanti wa serivisi ishinzwe ubuzima muri Ghana, Dr. Emmanuel Tenkorang yagaragaje ko iki ari ikibazo cy’ingutu kigomba gukorwaho iperereza. Ghana imaze kubarura abantu barenga 3,600 banduye Covid-19 mu gihe abitabye Imana bagera kuri 372.