Abagabo 3 banyweye umuti batera mu nyanya bashaka kwiyahura 2 birabahira

Abagabo batatu bo mu Midugudu itandukanye yo mu Kagari ka Nyabigoma mu Murenge wa Kinigi mu Karere ka Musanze, biravugwa ko banyweye umuti wica udukoko uzwi nka tiyoda, bikekwa ko bageragezaga kwiyahura babiri bibaviramo gupfa.

Amakuru dukesha Kigali Today avuga ko Abapfuye ari Iradukunda Patrick wo mu Mudugudu wa Mitobo mu Kagari ka Nyabigoma, akaba yari afite imyaka 20 na Tuyiringire Félicien w’imyaka 26 wo mu Mudugudu wa Rebero muri ako Kagari. Abaturage bagerageje kubihutana kwa muganga ariko birangira bapfuye.

Undi musore wagerageje kwiyahura ni Niyomugabo Alexis wo mu Mudugudu wa Nyakagezi, gusa we ntabwo yapfuye kuko abaturage bahise bamugeza kwa muganga aravurwa, ndetse kuri ubu yarasezerewe.

Amakuru aravuga ko uyu Alexis yashatse kwiyahura bitewe n’igitutu iwabo bari bamushyizeho.