Cristiano Ronaldo ni we uyoboye urutonde rw’abakinnyi ba ruhago Ku Isi bahembeshwa igitiyo .

Cristiano Ronaldo, umunyabigwi w’umupira w’amaguru ukomoka muri Portugal, yongeye kugaruka ku mwanya wa mbere mu bakinnyi bahembwa agatubutse kurusha abandi ku Isi muri 2024. Uyu rutahizamu ukinira Al-Nassr yo muri Saudi Arabia, akomeje kwerekana ko atari gusa umunyabigwi mu kibuga, ahubwo no hanze yacyo akomeje kwihagararaho mu bijyanye n’ubukungu.

Nk’uko byatangajwe, Cristiano Ronaldo ahembwa miliyoni 263 z’ama-Euro (263 M€) ku mwaka, akaba ari we uyoboye urutonde rw’abakinnyi 10 bahembwa amafaranga menshi ku Isi. Akurikiwe n’umunya-Argentine Lionel Messi, ukinira Inter Miami yo muri Leta Zunze Ubumwe za Amerika, akaba ahembwa miliyoni 124 z’ama-Euro (124 M€).

Mu myanya ikurikira, Neymar Jr. ukinira Al-Hilal muri Saudi Arabia, ari ku mwanya wa gatatu, ahembwa miliyoni 101 z’ama-Euro (101 M€), mu gihe Karim Benzema nawe wagiye muri Saudi Arabia akinira Al-Ittihad, yinjiza miliyoni 96 z’ama-Euro (96 M€). Umunyabufaransa Kylian Mbappé, ukinira  Real Madrid, we ari ku mwanya wa gatanu, ahembwa miliyoni 83 z’ama-Euro (83 M€).

Erling Haaland, rutahizamu ukomeye wa Manchester City, we ahembwa miliyoni 55 z’ama-Euro (55 M€), mu gihe Vinícius Júnior ukinira Real Madrid ahembwa miliyoni 50 z’ama-Euro (50 M€). Umunya-Misiri Mohamed Salah, ukinira Liverpool, ari ku mwanya wa munani, yinjiza miliyoni 48 z’ama-Euro (48 M€).

Umunya-Senegal Sadio Mané, ukinira Al-Nassr, ari ku mwanya wa cyenda, ahembwa miliyoni 47 z’ama-Euro (47 M€). Kevin De Bruyne, umukinnyi wo hagati wa Manchester City, ni we uzuza urutonde rw’abakinnyi 10 bahembwa amafaranga menshi, aho yinjiza miliyoni 35 z’ama-Euro (35 M€).

Ibi bigaragaza uburyo ubukungu bw’umupira w’amaguru bugeze ku rundi rwego, aho abakinnyi b’ibyamamare bakomoka mu bihugu bitandukanye bakomeje kugenerwa umushahara utagereranywa mu makipe atandukanye ku Isi, cyane cyane mu makipe yo muri Saudi Arabia n’ibindi bihugu bifite ubushobozi bukomeye mu by’ubukungu.