SALIM Prince Waziel
Ubushinjacyaha bwa Leta Zunze Ubumwe za Amerika burahangayikishijwe n’umwe mu bagore barega Diddy ihohotera rishingiye ku gitsina, kuko atigeze yifatanya na bo ndetse ntiyigeze yemera gutanga ubuhamya nubwo yashyizwe ku rutonde rw’abagomba kuburana.
Abashinjacyaha bo ku rwego rwa leta ya Amerika bari gukina ku buryo butarimo icyizere ku buhamya bwa bamwe mu bashinja Sean “Diddy” Combs, mu rubanza aregwamo ihohotera rishingiye ku mibonano mpuzabitsina. Umugore bise “Uwahohotewe wa 3” byagaragaye ko kuva kera atigeze yifuza gutanga ubuhamya, ndetse n’ubu ntacyo abashinjacyaha bamaze kumenya ku bijyanye n’uko yaba azitabira urubanza, nk’uko ikinyamakuru cyabitangarijwe.
Mu gihe cyo gutoranya inteko iburanisha muri iki cyumweru, umushinjacyaha mukuru Maurene Comey yemereye urukiko ko leta itazi neza niba uwo mugore bivugwa ko ari umwe mu bahoze bakundana na Diddy azagaragara imbere y’urukiko ngo atange ubuhamya amushinja. Comey yavuze ko uwo mugore ataba hafi y’aho urubanza rubera, hakaba hari ikibazo cyo kumenya aho umwunganira mu mategeko aherereye, ndetse ngo nubwo yahawe subpoena (itegeko ryo kwitaba urukiko), ashobora kutazitabira na rimwe.
Amakuru twahawe n’abantu bazi neza ibiri kubera imbere mu rubanza avuga ko uwo mugore atigeze na rimwe yifatanya n’abashinjacyaha, ndetse ntanigeze abereka ko yiteguye kubatangariza ibyo yaba yarahuye na byo imbere y’urukiko.
Ibi byatumye abantu bibaza impamvu abashinjacyaha bashyize izina rye muri dosiye ishinja Diddy, kandi bakaba bagomba gusobanura impamvu atazaboneka mu cyumweru gitaha, ubwo bazatangira gusobanura ku mugaragaro uko urubanza ruzagenda.
Kugeza ubu, haracyari urujijo ku bazahamagarwa n’ubushinjacyaha ngo batangire gutanga ubuhamya mu ntangiriro z’uru rubanza.
Abashinjacyaha barahanzwe amaso ku byemezo bikomeye bagomba gufata ku bijyanye na “Uwahohotewe wa 3” by’umwihariko niba bazamuvuga mu nyandiko y’ibanze (opening statement). Nibaramuka bamuvuze, hanyuma ntaze, abacamanza bashobora gutangira kugira impungenge, kandi ibyo bishobora gukomeretsa urubanza ku ruhande rw’ubushinjacyaha.
Nk’uko byatangajwe, Comey yavuze ku wa Mbere ko ubushinjacyaha butazatangira kuvuga ku nkuru y’uwo mugore kugeza bageze mu gice cya kabiri cy’urubanza. Ku ikubitiro, bazamuvuga mu buryo rusange nk’umwe mu bagore benshi bavuga ko bakorewe ihohotera rishingiye ku gitsina na Diddy.
Mu myanzuro y’iregwa, uwo mugore agaragaramo nk’uwakorewe ihohotera rishingiye ku bucuruzi bw’abantu n’imibonano mpuzabitsina (sex trafficking).
Undi mugore wigeze gukundana na Diddy, uzwi cyane nka Cassie, ni we wahawe izina rya “Uwahohotewe wa 1”, kandi biteganyijwe ko azatanga ubuhamya akoresheje izina rye bwite nubwo igihe azabikorera kitari cyatangazwa.
Cassie ubwe ubu ari i New York, aho agaragara mu ruhame afite inda nkuru cyane abafana benshi bakeka ko ashobora kuba asigaje ukwezi kumwe gusa ngo abyare.
Mu bagore bane bashinja Diddy muri uru rubanza, batatu ni abo bahoze ari abakunzi be. Mu nyandiko zashyikirijwe urukiko, ubushinjacyaha buvuga ko “Uwahohotewe wa 2” azatanga ubuhamya mu ibanga, agaruka ku igihombo cy’amafaranga, gukenera Diddy mu buryo bwihariye no kwigunga mu gihe bari mu rukundo ibintu byose byamugize umunyantege nke imbere ye, bigatuma abasha kumushyiraho igitutu no kumugenza uko ashaka.
