Umurinzi wa Pariki y’Igihugu ya Nyungwe yatemwe akaguru

Abasore babiri bavukana bo mu Mudugudu wa Bururi, Akagari ka Banda mu Murenge wa Rangiro, mu Karere ka Nyamasheke, batawe muri yombi bakekwaho gutema umurinzi wa Pariki y’Igihugu ya Nyungwe wabafashe bayinjiyemo mu buryo butemewe n’amategeko.

Aba basore batemye uyu mugabo urinda Pariki y’Igihugu ya Nyungwe ahagana saa Mbili z’amanywa yo ku Cyumweru, tariki ya 29 Ukwakira 2023.

Amakuru agera ku IGIHE dukesha iyi nkuru avuga ko aba basore ubwo binjiraga muri Nyungwe bahuye n’abasore bane bashinzwe kuyirinda bababaza impamvu bayinjiyemo mu buryo bunyuranyije n’amategeko maze umwe muri bo ahita atema umwe mu bayirinda.

Umunyamabanga Nshingwabikorwa w’Umurenge wa Rangiro, Habimana Alfred, avuga ko aba basore uko ari babiri bahise batabwa mauri yombi ndetse bafungiye kuri Sitasiyo ya RIB ya Kanjongo mu gihe uwakomerekejwe ukuguru we ari kuvurirwa ku Bitaro by’Akarere ka Nyamasheke bya Kibogora.