Kubwayo Mc croix
Iyo umuntu yumvise izina Murangwa Eric Eugène, ahita yibuka umukinnyi w’umupira w’amaguru w’inararibonye wanyuze mu makipe akomeye ndetse akaba yaragize uruhare mu kubaka amateka ya ruhago nyarwanda. Ariko inyuma y’izo ntsinzi zose, harimo inkuru ikomeye y’ubuzima bwamukomerekeje ariko akabukiramo isomo rikomeye ko umupira w’amaguru ushobora kuba igikoresho gikomeye mu kurwanya amacakubiri no guteza imbere indangagaciro z’ubumuntu.
Mu gihe cya Jenoside yakorewe Abatutsi mu 1994, Murangwa Eric yari umwe mu bakinnyi bazwi cyane mu gihugu. Iyo mpano ye yo gukina umupira ni yo yamubereye nk’ikirango cyamurindaga urupfu. Abamuzi icyo gihe baramuhishaga, baramurengera, ndetse baramurwanira kubera ko yari umukinnyi ukomeye. Ibi byatumye yumva neza ko ruhago itari umukino gusa, ahubwo ishobora gukiza ubuzima.
Nyuma yo kubaho nyuma ya Jenoside, Murangwa ntiyahisemo gusubira gusa mu kibuga, ahubwo yahisemo kukibyaza umusaruro nk’inzira yo gutanga ubutumwa bwo kubaka amahoro arambye. Ni muri urwo rwego, mu mwaka wa 2010, yashinze Ishami Foundation, umuryango ugamije guhuza abana b’u Rwanda binyuze mu mupira w’amaguru, ariko ukabigisha n’amateka n’indangagaciro zituma bubaka igihugu kurusha kugisenya.
Uyu muryango wibanda ku rubyiruko, rukigishwa gukina umupira ariko rukanahabwa inyigisho z’amateka ya Jenoside ashingiye ku buhamya bwa Murangwa ubwe. Ibi bituma abana bumva neza aho igihugu cyavuye, aho kigeze, n’icyo bakwiye gukora ngo batange umusanzu mu kugikomeza.
Mu nyigisho zifashishwa muri gahunda ya Rwandan Values Curriculum yashyizweho na Murangwa, umutoza ntasigara ari uwigisha gukina gusa. Ahinduka nk’umubyeyi, umujyanama n’umutoza w’ubuzima. Aha ni ho yerekana ko 20% by’imyitozo bikwiye kwifashishwa mu gutanga amasomo y’ubumuntu, nk’uko abakina bagomba kwigishwa koroherana, kwiyubaha, no gukorera hamwe.
Umwana wese akwiye kwitabwaho kimwe, atavanguwe ku buryo bw’amoko, idini, igitsina cyangwa inkomoko. Uyu mwihariko w’iyi gahunda ni wo utuma abana biga gukina batarwana, batarushanwa mu buryo bw’amacakubiri, ahubwo bakubaka ubumwe.
Icyo Murangwa yagezeho ni gihambaye: yahinduye ikintu cyamukijije ubuzima, akagihindura urufunguzo rwo gukiza ubuzima bw’abandi mu buryo burambye. Ishami Foundation ni urumuri ku bandi bifuza gukoresha impano zabo mu guteza imbere umuryango nyarwanda. Yatangiye nk’umukinnyi w’umupira, none abaye icyitegererezo cy’umuyobozi w’impinduka.
Murangwa yerekanye ko siporo, cyane cyane ruhago, ishobora kugira uruhare rukomeye mu kunga Abanyarwanda, kurandura urwango no gutera imbuto y’ubwiyunge mu mitima y’abana b’iki gihe bazaba abayobozi b’ejo.
