Kubwayo Mc croix
Imbangukiragutabara y’Ikigo Nderabuzima cya Nyabitimbo yakoze impanuka mu Mudugudu wa Kabugarama, Akagari ka Cyingwa, Umurenge wa Gitambi mu Karere ka Rusizi, mu masaha ya saa munani z’ijoro rishyira ku Cyumweru tariki ya 27 Ukwakira 2024. Iyo modoka yari itwaye umugore utwite inda y’amezi ane, umuganga, umushoferi, umurwaza n’umwana w’amezi umunani. Umugore yaje gutakaza inda ye kubera iyo mpanuka, naho abandi bose barakomereka bikomeye.
Umuyobozi w’Ikigo Nderabuzima cya Nyabitimbo, Gérard Niyitegeka, yavuze ko iyo modoka yari igiye ku Bitaro bya Mibilizi gutabara, ariko yarenze umuhanda igwa mu kabande muri metero 300 uvuye ku muhanda nyamukuru. Abakomeretse bahise bajyanwa mu Bitaro bya Mibilizi, mu gihe umugore wakuyemo inda we yoherejwe mu Bitaro bya CHUB.
Ni ubwa kabiri iyi modoka ikora impanuka mu gihe gito. Indi mpanuka y’imbangukiragutabara yo muri Nyabitimbo yari yahitanye abantu batanu mu Ukwakira 2023. Niyitegeka yagaragaje impungenge ko kongera kubura imodoka yo gutabara bishobora gukurura ibibazo, kuko abagore babyarira mu nzira batabashije kugera ku bitaro ku gihe.
Umuvugizi wa Polisi, SP Emmanuel Kayigi, yavuze ko impanuka yatewe n’uburangare bw’umushoferi, asaba abashoferi kwitwararika no kuruhuka igihe batwaye nijoro.
