Kubwayo Mc croix
Umukinnyi ukina asatira w’umunya-Georgia, Khvicha Kvaratskhelia, arateganya kuva muri Napoli muri uku kwezi kwa Mutarama, aho Paris Saint-Germain (PSG) ari yo iyoboye ibiganiro byo kumwegukana.
Amakuru aturuka mu binyamakuru bitandukanye yemeza ko PSG na Napoli bari mu biganiro byimbitse, kandi ko igiciro cy’uyu mukinnyi kiri hagati ya miliyoni 70 na 80 z’amayero.
Kvaratskhelia, w’imyaka 23, amaze kwigaragaza cyane muri Serie A, aho yatsindiye Napoli ibitego 12 mu mwaka we wa mbere, agatanga n’imipira 13 yavuyemo ibitego, bikaba byarafashije ikipe kwegukana Scudetto nyuma y’imyaka 33 batayitwara.
Nubwo amakipe nka Manchester United na Liverpool nayo yari yagaragaje inyota yo kumusinyisha, Kvaratskhelia ubwe yahisemo kwerekeza muri PSG, aho ibiganiro ku bijyanye n’amasezerano ye bwite biri kugenda neza.
Amakuru mashya kandi avuga ko Kvaratskhelia atazakina umukino wa Napoli na Hellas Verona, mu gihe ibiganiro hagati y’impande zombi bikomeje.
