Abaturage basabye ubuyobizi kwita ku buzima bw’umwana ukurikiranweho icyaha cyo gucuruza ibiyobyabwenge

Ubuyobozi bw’Umurenge wa Kimisagara bwatangaje ko bugiye gukurikirana ubuzima bw’umwana utuye muri uyu murenge uherutse guhamywa icyaha cyo gucuruza ibiyobyabwenge ngo hitabwe ku burere n’imyitwarire bye.

Urukiko Rwisumbuye rwa Nyarugenge rwamuhamije icyaha cyo gucuruza ibiyobyabwenge ariko rumukatira imyaka ibiri isubitse.

Kimwe mu byashingiweho ahabwa igihano gisubitse nk’uko umucamanza yabigaragaje ni uko uyu mwana yabishowemo n’ababyeyi be kuko yavuze ko yatangiye kubicuruza afite imyaka 12 ubwo yigaga mu mwaka wa kabiri w’amashuri abanza.

Umucamanza yategetse ko uyu mwana ahabwa ibihano bisubitswe kugira ngo hitabwe ku mibereho ye ndetse anafashwe kugira imyitwarire myiza ngo hato adasubira muri bya bikorwa bibi.