Connect with us

Sobanukirwa imiti yo kuboneza urubyaro, n’ukuri ku bihuha bivugwa ku ngaruka zayo

inkoranabuhanga

Sobanukirwa imiti yo kuboneza urubyaro, n’ukuri ku bihuha bivugwa ku ngaruka zayo

Leta ikangurira abaturage kubyara abo batekerejeho, atari ibintu bitunguranye, mu rwego rwo gutegura ejo hazaza heza. Niyo mpamvu abantu bakangurirwa kuboneza urubyaro hakoreshejwe uburyo butandukanye, gusa bamwe mu babukoresha ntibasobanukiwe n’uko bukora.

Muganga ukurikirana indwara z’abagore (Gynecologue), adusobanurira byinshi ku ikoreshwa ry’uburyo butandukanye bwo kuboneza urubyaro ndetse anatumare impungenge ku bihuha by’ingaruka zaba ziterwa n’ubu buryo.

Mu kiganiro Izubarirashe.rw twagiranye Dr Rulisa, ubusanzwe ukora muri Kaminuza y’u Rwanda, ishami ry’ubumenyi mu buzima(UR/CHS), yahoze ari KHI, yatangiye atubwira uko icyo iyi miti ikora iyo igeze mu mubiri w’umuntu.

“Ubundi iyi miti abantu bafata yo kuboneza urubyaro, ikora mu buryo butandukanye, bitewe n’uko ikoze. Uburyo bwa mbere, ni ubw’imiti ikoreshwa mu guhindura imikorere y’umubiri. Iyi miti iba igizwe n’imisemburo (hormones) ihindura imisemburo isanzwe itera umugore uburumbuke. Iyo iyi miti igeze mu mubiri rero, ituma umusemburo utuma umugore ajya mu burumbuke idakora, bityo bikaba bitashoboka ko asama.

Muri iyi miti twavugamo nka pilule (utunini dufatwa buri munsi), DEPO-PROVERA (urushinge rw’amezi atatu ndetse na NEXPLANON (bashyira munsi y’ukuboko, ikamara imyaka itanu cyangwa itatu).

Uburyo bwa kabiri ni uburyo bw’umupaka cyangwa bariyeri, ibuza intanga ngabo kuba yagera aho intangangore iri ngo bibe byahura, bityo bikore umwana mu nda ya nyina.

Muri bwo harimo ubwo bita Sterilet cyangwa se IUD, ishyirwa mu mura w’umugore. Iyi rero iba imeze nk’umupaka ubuza intangangabo kuba zahita ngo zigere ku ntanga ngore, bityo bikabuza umugore gusama. Mu gihe bidakunze, intangangabo ikaba yahita igahura n’intangangore, IUD iba iri mura, aho umwana yagombaga gukurira, ibuza izi ntanga zombi kumanuka ngo zibe zajya gukurira mu mura, bityo, gutwita bikaba bitagishobotse.

Ubundi buryo ni agapira gashyirwa mu nda ibyara, kagafunga inkondo y’umura bityo intangangabo zikaba zitabasha guhita.”

Ku byerekeranye n’ingaruka rero, Dr Rulisa yasobanuye ko na zo ziterwa n’uburyo ukoresha gusa ndetse n’imiterere ya buri wese ku giti cye.

Yagize ati “Ubu buryo bwo kuboneza urubyaro ni byo koko bugira ingaruka ku babukoresha, gusa icyo abantu bakwiriye gusobanukirwa ni uko bugenda bugira ingaruka ku muntu bitewe n’ubwoko akoresha ndetse n’imiterere ye bwite kandi bakibuka ko muganga aba ahari ngo abafashe guhitamo neza uburyo bakoresha birinda kugendera ku bandi ndetse n’igihe bagize za ngaruka bakagisha inama muganga kuko akenshi biba atari ibintu bikomeye.

Nko ku buryo bw’imisemburo ishyirwa mu mubiri twavuze haruguru, birumvikana ko iyo misemburo iba ari mishya ku mubiri, bityo umubiri w’uyikoresha ukaba ugomba gufata igihe cyo kuyimenyera, ibyo byose kandi bikagendana n’imiterere bwite ya buri muntu. Hari abo usanga yarateye kubyibuha cyane abandi bakananuka cyane, hari abagira imihango idakama n’abo ihagarara burundu, n’ibindi byinshi. Gusa ibi ntibigomba kubahangayikisha cyane kuko mu gihe cy’amezi atatu umubiri uba watangiye kumenyera bityo n’ibyo bibazo bigakemuka. Mu gihe ariko umubyeyi yumvise bimukomereye cyane cyangwa se  atizeye neza ibyo abona bimubaho agomba kwegera muganga akamufasha kumenya niba ibimubaho byaratewe n’iyi miti, niba bishobora gukemuka agakomeza kuyikoresha cyangwa se niba bitajyanye n’imiterere ye akayihagarika.

ifoto-2-696x535

Nta bizamini se bikorwa mbere yo gufata iyi miti ngo izo ngaruka zibe zakwirindwa?

Aha Dr Rulisa yadusobanuriye ko izi ngaruka ari ibintu bidashobora kumenyekana mbere y’uko iyi miti ikoreshwa. Ati “Ingaruka zibaho, ariko ntabwo twabasha kubimenya mbere kandi biterwa n’imiterere y’umuntu. Urayifata ugakomeza gukurikiranwa na muganga kuko akenshi nyuma y’igihe gito umubiri urabimenyera. Gusa mu gihe nyir’ugufata imiti afite ibibazo by’uburwayi bwa diyabete, umutima, umuvuduko ukabije w’amaraso, bisaba ko abanza gukoresha ibizamini ngo barebe ko ntacyo byangiriza ku mubiri we, ibi buri mubyeyi akaba abibazwa mbere y’uko afata umuti uwo ariwo wose

Ku bavuga se ko udupira dufunga inkondo y’umura twaba tunyereza umura bikaba byatuma umuntu atongera kubasha gusama nabamara impungenge kuko ntaho duhurira n’umura tugarukira mu nda ibyara tugafunga inkondo. Ntaho duhurira n’umura rero, ibyo ni ibihuha. Icyo nababwira ni uko ubu buryo bwose budakora 100%, uramutse usamye rero kandi utarayihagaritse ntibiba bivuze ko hari ikibazo cyihariye ufite.”

Yasoje agira inama abagore ababwira ko buri gihe umuntu agomba kugira igihe cyo kuganira na muganga haba mbere cyangwa se na nyuma y’uko akoresha uburyo ubwo ari bwo bwose bwo kuboneza urubyaro, mu rwego rwo kwirinda ibyo bibazo byose.

Continue Reading
Advertisement
You may also like...
Click to comment

Leave a Reply

Your email address will not be published. Required fields are marked *

More in inkoranabuhanga

Izo twabahitiye mo

Advertisement

Top 5

indirimbo

Meddy ft Nish – Downtown

By July 17, 2019

indirimbo

Izina Ryanjye by Christopher

By July 17, 2019

indirimbo

Ni Forever by Kamichi

By July 5, 2019

indirimbo

Abana babi by Danny Vumbi

By July 5, 2019

Facebook

To Top