Itsinda rya ‘The Brothers’ rishobora gusubirana

Izina “The Brothers”, ryibutsa benshi indirimbo nka ‘Byabihe’, ‘Nyemerera’, ‘Yambi’, ‘Sawa sawa’ n’izindi. Hashize igihe kinini iri tsinda ritandukanye, gusa ubu bishoboka ko iri tsinda ryasubirana.

Ziggy 55 yavuze ko itsinda rya The Brothers rishobora kongera gutungurana mu minsi ya vuba

Fikiri Nshimiyimana (Zigg 55), Victory Fidele Gatsinzi (Vicky) na Daniel Semivumbi (Danny Vumbi) nibo bahanzi bari bagize iryo tsinda.

Nyuma baza gutana kubera impamvu zitandukanye,  byagiye bivugwa ko bashobora kuba barapfuye ko hari bamwe bitangaga cyane abandi ibikorwa by’itsinda ntibabishyiremo imbaraga.

Ziggy yabwiye City Radio ko ibyo byose byagiye bivugwa byari ibihuha byatangwaga n’abatarifuzaga ko iryo tsinda rikomera. Ko ahubwo hari indirimbo zirimo gukorwa zishobbora kujya hanze vuba.

Ati “The Brothers ntabwo twigeze dutana nkuko byavuzwe. Ahubwo twagize inshingano zitandukanye zatumye buri umwe asa naho ahuze cyane ntitwongera gukora indirimbo turi kumwe. Ariko mu minsi mike abantu bashobora gutungurwa”.

The Brothers yatangiye kuririmba mu mwaka wa 2004 icyo gihe itangizwa na Danny Vumbi na Vicky. Ziggy aza kwinjiramo mu mwaka wa 2006.

Kugira ngo iri tsinda rivuke, umuhanzi Vicky yahuriye na Danny Vumbi muri KIE yumva aririmba neza biyemeza gutangirana urugendo rw’ubuhanzi.

Iri tsinda ryatwaye igihembo cya Never Again muri 2004, PAM Awards 2006, Salax Awards 2008, Ijoro ry’Urukundo Awards 2009 na East African Music Awards 2011.

Bahagaritse gukorana nk’itsinda bafitanye indirimbo zisaga 29 zikubiye kuri Album ‘Impinduka’ basohoye mu mwaka wa 2010 yari iriho indirimbo 10 zahimbwe kuva mu mwaka wa 2004 kugeza 2009.

Mu mwaka wa 2011, uretse kuba baratwaye East African Music Awards, The Brothers bakoranye indirimbo na Prince Kid yitwa ‘Nsubiza’ ndetse banakorana n’umuhanzi Franky Joe yitwa ‘Nyabuneka’.

Kanda hano wumve indirimbo nshya ya Ziggy 55 yise A L’aise 

Source:Umuseke

Comments

0 comments