Impinduka itunguranye ku gitaramo cya Sauti Sol

Abasore bagize itsinda rya Sauti Sol bemeza ko Perezida Paul Kagame ari we mukuru w’iguhugu wa mbere muri Afurika akaba ari na yo mpamvu nyamukuru bamuririmbye mu ndirimbo yabo Nerea.

Sauti Sol ni itsinda ry’abaririmbyi bane bo muri Kenya bakunzwe cyane muri iyi minsi. Bari mu Rwanda aho baje kumurika Album yabo bise Live and Die in Africa.

Zimwe mu ndirimbo zaririmbwe na Sauti Sol harimo iyitwa Nerea igaruka ku mukobwa uba utwite inda atateganije agashaka kuyikuramo ariko uwayimuteye akamubuza amubwira ko uyu mwana ashobora kuba umuntu ukomeye ku isi nka Perezida Kagame n’abandi batandukanye.

Mu kiganiro n’abanyamakuru cyabaye kuri uyu wa 16 Nzeli 2016, umwe mu bagize iri tsinda witwa Bien-Aimé Baraza yahishuye ko impamvu baririmbye Perezida Kagame ndetse akaba ari we muyobozi w’igihugu muri Afurika ukiriho baririmbye ari uko babona ari we muperezida mwiza muri Afurika kubera impamvu zitandukanye.

Yagize ati: “Uko mbibona kugeza ubu Kagame ni we Perezida wa mbere muri Afurika, yateje imbere u Rwanda, Kigali ni umujyi ukeye wagira ngo ni i Burayi , ahantu hose urahasanga interineti y’ubuntu, yorohereza abashoramari kuza gukorera mu Rwanda, ni umuyobozi mwiza.”

Undi uririmba muri Sauti Sol witwa Savara Mudigi na we yashimangiye ko Perezida Kagame ari uwa mbere muri Afurika abishingiye ku kuba u Rwanda ari igihugu kigendwa n’abashaka bose kandi ku buryo bworoshye.

Yagize ati: “ Reba iyi ni indangamuntu yanjye, nta pasiporo nazanye turishyira tukizana mu Rwanda.”

Ni ku nshuro ya kane Sauti Sol bageze mu Rwanda ariko na none ni ubwa kabiri bagiye gutaramira Abanyarwanda.

Sauti Sol izaririmba ejo kuwa 17 Nzeli 2016 aho bazaba bafatanyije n’abahanzi b’Abanyarwanda barimo Yvan Bravan, Three Hills na Neptunez Band, Kizabera i Gikondo ahabera imurikagurisha aho kubera ahazwi nka Camp Kigali nk’uko byari byatangajwe mbere.

Iki gitaramo cyari kuzaba kuwa 20 Nyakanga ariko biza gusubikwa ku munota wa nyuma .

Bien-Aimé Baraza yemeza ko nta muperezida muri Afurika uruta Kagame

Savara Mdigi (ufite Mikoro) na we ntasobanya na bagenzi be ku butwari bwa Perezida Kagame

Abanyamakuru bari bitabiriye ku bwinshi

Biteguye gushimisha abanyarwanda