Dany Nanone na Jody Phibi birekuye mu mashusho y’indirimbo I Love you Too(Video)

I love you too ni indirimbo yuje imitoma y’urukundo umuraperi Dany Nanone yahuriyemo n’umuhanzikazi Jody Phibi, kuri ubu yageze hanze iherekejwe n’amashusho yayo nayo agaragaza kwirekura bisesuye hagati y’aba bahanzi mu bijyanye n’uburyo bitwaye imbere ya camera.

Dany Nanone yadutangarije ko Jody Phibi ari umwe mu bahanzikazi bafite impano ihebuje mu Rwanda yahoze yifuza gukorana nabo, ndetse akamushimira uburyo bashyize umutima ku kintu kimwe bagakora iyi ndirimbo, aho banizeye umusaruro uzava ku bushake bashyizemo.

Uyu muraperi yanaboneyeho gutangaza ko nubwo iyi ndirimbo ari iy’urukundo nta kindi kintu gikomeye kiri hagati yabo usibye kuba barahujwe n’akazi bakora bakunze k’umuziki.

Ku bwa Dany Nanone uhamya ko yibarutse impanga, dore ko uretse amashusho y’iyi ndirimbo ye na Jody, yanahise asohora indi nshya yise ‘Meze neza’ yafatanije na Pacento, uyu muraperi avuga ko yahisemo gushyira hanze icya rimwe izi ndirimbo mu rwego rwo gusoza umwaka neza, akaninjira mu mushya ahagaze bwuma.

Comment