Asinah yasohoye amashusho arimo imibyinire idasanzwe (Video)

Asinah agiye kumara umwaka mu ruhando rwa muzika, yatangiye aririmba mu njyana ya Dancehall ndetse album ya mbere ari gukora izaba igizwe n’indirimbo ziganjemo izifite umudiho wa Kinyafurika na Jamaica.

Afite indirimbo izwi cyane yise “Iz’ubu” iri mu zamumenyekanishije nk’umuhazi, nyuma yasohoye izindi zirimo iyitwa ‘Game Over’ yakoranye n’umuraperi Neg G The General, n’izindi yahuriyemo n’abandi bahanzi.

Asinah yavuze ko  ‘Do It’ iri mu mishinga ikomeye amazeho iminsi ndetse ko kuyifatira amashusho no gukurikirana imirimo yo kuyatunganya byamutwaye imbaraga nyinshi.

Ati “Iyi ndirimbo yanjye navuga ko imaze igihe yarantwaye umwanya munini kuko nashakaga ko isohoka ifite ingufu n’umwihariko kurusha izindi naririmbye mbere. Abakobwa nakoreshejemo urabona ko babyina bakirekura, uburyo video iyoboyemo urabona ko nabwo bwihariye nkaboneraho umwanya wo gushimira Producer Meddy Saleh yakoze akazi gakomeye.”

Yongeyeho ko amashusho ya ‘Do It’ azakurikirwa n’indi mishinga mishya afite izasohoka bidatinze harimo amashusho y’indirimbo ‘Game over’, indirimbo ari gukorera kwa Producer Davydenko n’indi iherutse gukorwa na Producer Pastor P.

Asinah avuga ko ashaka kugeza umuziki we ku rwego mpuzamahanga

Ati “Nyuma y’igisibo cya Ramadhan ngiye kongera gukomeza akazi kanjye k’umuziki, ibikorwa bishya birahari ngiye kubisohora vuba. Nsa n’umaze igihe gito ntavuga, ariko navuga ko byatewe n’igisobo mazemo iminsi ariko nari mfite umushinga ndi gukora ari nawo ngejeje ku bafana.”

Asinah kandi ari gutegura album ya mbere yifuza ko izaba igizwe n’indirimbo zirimo iz’Icyongereza n’izindi zo mu ndimi zivugwa muri Afurika y’Uburasirazuba cyo kimwe na nkeya z’Ikinyarwanda. Yakozweho Producer Pacento, Trackslayer, Pastor P na Davydenko ari na we bari gukorana cyane muri iki gihe.