Allioni “Ntabwo nkundana na Washington kuko ni umugabo wubatse”

Allioni umwe mu bakobwa bigaragaza muri iyi minsi mu bitaramo bya Primus Guma Guma Superstar ku nshuro ya 6 (PGGSS6) byagiye bivugwa yaba akundana na Washington, wo muri Uganda, uyu munsi arasobanura uburyo bamenyanye.

Allioni avuga ko yahuye na Washington mu mwaka wa 2013 aribwo yanamukoreye indirimbo ya mbere.

Nyuma y’uko aba bombi bahuye havuzwe amagambo atari make ko Washington na Allioni baba bakundana.

Izuba Rirashe: Wahuye na Washington gute?

Allioni:Mpura na Washington bwa mbere twahujwe n’inshuti ya mukuru wanjye.

I R: Hari amagambo yigeze kuvugwa ko waba ukundana  na Washington? Ese byabayeho cyangwa ni amagambo?

Allioni:Ntabwo nigeze nkundana na Washington kuko ni umugabo wubatse, ufite urugo, umugabo uzi ibyo akora, n’umuproducer mwiza, ukunda muzika  unshyigikiye Allioni kurusha abandi.

I R: Ushingira kuki uvuga ko agushyigikiye kurusha abandi?

Allioni: Ni umuntu wandeze muri muzika, azi aho ngira intege nke, aho ngira imbaraga, yishimira iterambere ryanjye.

Ni muri urwo rwego avuga ko Washington ari mu bantu bishimira ibikorwa bye ati “umusaruro yanshakagaho utangiye kugaragara.”

Washington ni we wakoze indirimbo ya Allioni yitwa “Impunduka” yanakunzwe n’abantu batandukanye.

Zimwe mu ndirimbo za Allioni ni Pole Pole, Impinduka, Uramfite, Ni uwanjye n’izindi.

SRC: Izubarirashe