Abajura bacucuye Uncle Austin asigara yitotomba.

Austin Tosh Luwano [Uncle Austin], umunyamakuru wa Kiss FM akaba n’umuhanzi nyarwanda mu njyana nyafurika yatewe n’abajura bamwiba ibikoresho byinshi, gusa yemeza ko ari akagambane yakorewe kugirango byibwe aho atunga urutoki abanyerondo.

Mu ijoro ryo kuri uyu wa Kabiri tariki ya 26 Nyakanga, nibwo Uncle Austin yatunguwe no gusanga yacucuwe mu nzu ye, ibi yabishimangiye mu nyandiko yashyize ku rukuta rwa Facebook.

Ati ” Sha Abajura Mwambabaje pee….iyo laptop irimo indirimbo nyinshi ntarasohora kandi ntahandi nzifite pe, my documents za kazi, z’ubuzima busanzwe …basi ibindi mubigumane ariko yo muyizane muyijugunye hafi nzakuyitora ..ibindi mwatwaye mubigumane ariko yo muyigarure mbasabye mpfukamye.”

Uyu muhanzi avuga ko abajura bamwibye ibikoresho byose byari mu ruganiriro uretse intebe, mu byatwawe harimo mudasobwa, televiziyo (flat screen) n’ibindi bitandukanye, byose birabarirwa agaciro k’amafaranga y’u Rwanda ari hagati ya 1.500.000 na 2.000.000.

Austin yatangaje ko abajuru bageze aho atuye Kicukiro mu mujyi wa kigali, bafungura inzu abamo kuburyo nawe atamenye uko byagenze, bagatwara ibintu byose hasigara intebe zo mu ruganiriro gusa.

Yakomeje avuga ko ibyo yakorewe birimo akagambane k’abanyerondo bashinzwe, kuko umukozi wo mu rugo yabyutse mu gitondo akajya ahantu asanzwe afata amata bataramenya ko bibwe, umwe mu banyerondo akabibwira uwo mukozi yasubira mu rugo koko bagasanga bibwe, akaba atiyumvisha uburyo yaba yabimenye mbere y’uko bataka bityo akumva hari ikindi kibyihishe inyuma.